Sakantina shalom.Anga KBC ni nama skaniko tanggipa Gitel Jisuni bimungo salamko sakantina on∙chenga salam.Chinga ABDK ni a∙jao  aro bakgrimgimin A∙chik Baptist Krima XI ning∙o ge∙songgimin Baptist Mondolirangoni ge∙sa ong∙paa jeon sak 1000 memberang gnang.Chingni Mondoli Meghalayani chongipa songjinma Williamnagar-ni bijangchio donga.KBC ko re∙anggipa bilsi 1999 ni February 16 tariko chu∙gimik jakgitelgipa mondoli ong∙china parake on∙aha.Chinga bebera∙anio Jisu Isolni de ong∙aniko,janggi jokatani, uni sia aro chakatpil∙ani,gnigipa re∙bapil∙ani,Gisik Rongtalgipa aro Sastroan bil gnanggipa ong∙a ine bebera∙a.KBC Isolni okamako man∙giparang ong∙e jatrangona Nama Kattako gipatna kagimin ong∙e,dal∙batgipa Gitelni ge∙etgimin mission kamko ka∙na on∙kange kam ka∙a.Mondolini miksongani nisan bebera∙giparangko sninggipana tarie brigimin dilgiparang ong∙atna aro namgipa dilgiparang ong∙atna ja∙ku ga∙a.Chingni skaianio tiktak ong∙gipa bebera∙anio pangchakaniko done Isolni Kattako bilake sakki on∙a.Bebera∙giparangni gisepo chona dal∙a apsan bakrime Sunday School,Chadambe,General,Me∙chik dol streamline ka∙e mondoliko rikrima.Mondolini memberangna skianio Kristoko bijangchi donne memberangni change sapanio pangchake dangdike on∙ani kamna didianiko on∙a.Mondoli dilgipana tariani,missionni gimin,chadamberangko,gisikni bidingo tariani,on∙ani aro bi∙aniko didia.Sunday Schoolna gital gital namnamgipa lessonrangko jakkale bi∙sarangna dangdike on∙ani nambatatna ja∙ku ga∙a.Chingni mondolini web page-.ni ning∙ona nape sandion na∙simang chingni namnamgipa mondolini chipatgimin program aro Gitelni a∙baona re∙ange kamrangko ka∙anirangko niksona man∙gen.Ching baksa bakrime Isolko olakkina re∙baode,chinga gisik ka∙tongonin rimchaksoenga.Chinga olakkianio ning∙tue gisik ka∙tongonin Isolko mande ra∙e olakkina bebera∙gipa sakantiko didia.Gisiko aro bebeo chadamberang baksa Isolko olakkina jao changsa Contemporary Worship service-ko ong∙atrongenga.An∙chingni tangani miksonganiara Isolko olakkinasa a∙gilsako tangenga ine Mondoli bebera∙a.Isol sakantina pattichina.

Rev. Junalson Koksi Sangma
KBC,Williamnagar,INDIA.

KBC Vision Statement:

Bebera∙giparangko gisikni briaona tarie Isolni kamna on∙kanggipa dilgiparang ong∙atna.

Mision Statement:

Nama kattako knakugijagipa, gimaenggipa janggirangko jokatna, aro uamangko Pagipa Degipa aro Gisik Rongtalgipani bimungo sninggipa dakatna.