Mondolini Gimin Talatani :
Kusimkolko a∙bachengo sak 9 bebera∙gipa memberangchi bilsi 1964 o bipek songchengaha. Serikani gita Late Prensing Ch.Marakan skanggipa Kristoona an∙pilchenggipa gittimni mandeko Late Tangring R. Sangma, Simsanggre mondolini pamongni jakchi napolatchengaha.Uni ja∙mano ru∙utgijan Isol Rajasimla songoni jeon skanggipa A∙chik a∙songo kristian ong∙chenggipa biaponiko Late Pa Seknalson M. Momin sorkario kam ka∙gipa mandeko Isol ia biapona rimbadapaha. Indake Kusimkol songo bebera∙ani bitchilrang chana a∙bachengaha. Batanggimin bilsirangko nipilaton ka∙sine ka∙sine Kusimkol songo kristian bebera∙giparang nakatrikrikbana a∙bachengaha. Namen gisik ra∙na kragipa adita sak pagiparang jemangni bimungkon itihas-o janapna namen krabea uamangara Late Bangran R. Marak, Shri Willipson R. Marak, Late Horeswar R. Sangma, Shri Susesn D. Shira, Shri Phillingson K. Momin,aro Shri John Ch.Momin ia manderang an∙tangtangko Isolni kamna on∙kange ka∙anganichi gilja nok gitalko rikna tangka paisarangko jaantian an∙tangtangan nokantichi re∙e tangka gildilchengaha. Uamang gilja nok rikdilasan ong∙aijaha prayer meetingrangko ka∙dilaha aro chu∙gimik mondoli ong∙atna krengdilangaha. Simsanggre mondolionio jakgitelgipa mondoli ong∙na uamangni krenge dakdil ka∙dilachi February jani 16 tarikni 1999 bilsio ABDK aro Simsanggre mondoli songe on∙aha. Ua salrango mondolini pamong ong∙na songtangoni theology-o poraigipa dongkujae Pa Brenerzee B.Sangma jean Haryana Grace Bible College-o B,Th ko porae matchote dongengachim ukon mondolio head pamongni kamna rakkichengaha. Kusimkol mondoli Williamnagarara songjingmani bijangchigipa song ong∙an baksa nokdangrang namen missionni kamna ka∙oksigipa mondoli ge∙sa ong∙o dilgiparangko Isolni an∙tangni rasongna jakkalna. KBC skanggipa bilsi 2000 onin A∙chik songsarekrangna, Salgro salaram a∙dokrangna,Indiani aro sagal nalsaona ta∙rakgen missionary-rangko watatrorogipa mondoli ong∙aha.Batanggimin bilsirango an∙tangtangko on∙kange Isolna dangdike on∙anggipa ripengrangko gualna man∙ja maina uamang an∙tangtangni somoi aro tangka paisa aro biltangtangko Isolna ine kamrangko ka∙angaha. Isol dal∙batgipa ge∙etgimin kamrangko chu∙sokatna aro missionni nisanona sokna ja∙ku de∙e kamrangko ka∙angaha.
KBC missionni kamna ja∙ku de∙anio dingtangdingtang mission agency aro mission kamna gisik nanggipa mondolirangmung, krimarangmung bakrime Nama Kattako gipatna ja∙kua de∙angaha.Mondoli on∙ani aro bi∙ani,Isolko olakkianio namen Isolna ka∙oksigiparang ong∙e gisikni bidingo dal∙roroaniko aro dingtanganiko nikna man∙a. KBC o donggipa dedrangrangna tangchapil∙ani (Revival) sokbaanichi Isol chadamberangko aro nokdangrangko ra∙dotaiaha ine nikna man∙a.Isolni dal∙bea pattianirangna Isolna rasong ong∙china.Da∙alo Isolni ra∙doanichi bang∙a changgipa sapgipa musicianrang nakatrikrikbaenga aro Gitelna dangdike on∙a on∙kanggipa chadamberangko bate bate nikbatroroenga.Tangchapil∙ani walsare pangnan ching∙e dongchina ian chingni bi∙ani ong∙a.Amen.
Biapni gimin :Williamnagar songjinma ian East Garo Hills-ni skotonggipa biap ong∙an baksa ta∙raken dal∙roroenggipa songjinma ong∙a. Ian sea leveloni 860 feet chuao donga.Williamnagar songjinma namen ga∙nanggipa biap aro rotogipa biap ong∙a. Songjinmako bawile Simsang chibimachi jokduula unbaksana ia biapo je somoioba namnamgipa biterangko, gital me∙su samjakrangko man∙a amma.Bilsi karirang nama, mikkarang somoi gitan chu∙onge wae on∙a.Re∙a doani rama jal∙angrang pilakchin re∙na dona bijangchigipa biap ong∙an baksana badingchiwalna namgipa biapa ong∙a.Na∙a Williamnagarona re∙baode Kusimkol gilja compound-na re∙bana man∙gen aro changsa re∙bae nikangon aro re∙bataina siktaitaigen.
Tourism: Na∙a tourismni biaprangko nina sikgenchimode na∙tok jilgipa biaprang jekai – Nengmandal Fish sanctuary,Kusimkol wari,Memo lake,Soil lake boating,Togan Nengminja park,Horti Hub,Simsang dolong, dingdegipa dolong aro samba jolo bang∙a biap aro darerangko nina man∙gen.
------------
